सिद्धबाबा उपशाखाले गर्‍यो रक्तदाताको सम्मान

सरोकार टाइम्स

सिन्धुली, ३० जेठ ०८३

“रक्तदान जीवनदान” भन्ने सन्देशलाई व्यवहारमा उतार्दै आएका रक्तदाताहरूलाई नेपाल रेडक्रस सोसाइटी सिद्धबाबा उपशाखा, कमलामाई–४ ढुङ्ग्रेवासले सम्मान गरेको छ ।

विश्व रक्तदाता दिवसको अवसर पारेर आयोजित कार्यक्रममा विभिन्न समयमा उपशाखाले सञ्चालन गरेका रक्तदान कार्यक्रममा सहभागी भई रगत दान गरेका १४ जना रक्तदातालाई सम्मान–पत्र प्रदान गरिएको हो ।

नेपाल रेडक्रस सोसाइटी सिन्धुली जिल्ला शाखाका पूर्व सभापति अमरदीप देवकोटाले सम्मान–पत्र हस्तान्तरण गर्दै रक्तदाताहरूको योगदानको प्रशंसा गर्नुभयो । प्रमुख अतिथि देवकोटाले रेडक्रसका उपशाखा र जुनियर रेडक्रस समितिहरूलाई मानवीय सेवाको आधार स्तम्भको संज्ञा दिँदै समाजमा सकारात्मक परिवर्तन ल्याउन यस्ता अभियान आवश्यक रहेको उल्लेख गर्नुभयो ।

कार्यक्रममा बोल्दै सिद्धबाबा उपशाखाका सभापति सन्तोषकुमार बोहोराले रक्तदानले जीवन बचाउन महत्त्वपूर्ण भूमिका खेल्ने भएकाले रक्तदाताको सम्मानले अन्य नागरिकलाई पनि रक्तदानतर्फ आकर्षित गर्ने विश्वास व्यक्त गर्नुभयो । उहाँले मानव सेवामा समर्पित व्यक्तिहरूको योगदानलाई समाजले उच्च मूल्याङ्कन गर्नुपर्ने बताउनुभयो ।