भोटेकोशी बाढीपीडितका लागि एजीएन चर्चद्वारा २ लाख ४ हजार ५६० रुपैयाँ सहयोग

नबिनबाबु अधिकारी

सिन्धुली ३१ भदौ ०८३

भोटेकोशी क्षेत्रमा भदौ १० गते आएको विनाशकारी बाढीबाट प्रभावित परिवारका लागि सिन्धुलीका एजीएन अन्तर्गतका चर्चहरूले २ लाख ४ हजार ५६० रुपैयाँ आर्थिक सहयोग गरेका छन् ।

एजीएन जिल्ला समिति सिन्धुलीका अनुसार जिल्लामा आबद्ध ३३ वटा चर्चमध्ये २६ वटा चर्चमा सहभागी विश्वासी सदस्यहरूबाट उक्त रकम संकलन गरिएको हो ।

संकलित रकम प्रधानमन्त्री राहत कोषमा जम्मा गरिएको समितिले जनाएको छ । समितिका अध्यक्ष कुमार बुढाथोकीले जिल्ला प्रशासन कार्यालय सिन्धुलीलाई पठाएको पत्रमार्फत राहत सहयोग रकम राष्ट्रिय वाणिज्य बैंकमा रहेको प्रधानमन्त्री राहत कोषको खातामा जम्मा गरिएको जानकारी गराउनुभएको छ ।

समितिले रकम जम्मा गरिएको बैंक भौचरको प्रमाणित प्रतिलिपिसमेत जिल्ला प्रशासन कार्यालयमा बुझाएको जनाएको छ । आज सहायक प्रमुख जिल्ला अधिकारी दिपेन्द्र पौडेललाई बैंक भौचरको प्रमाणित प्रतिलिपि हस्तान्तरण गरिएको छ ।

विपद्का कारण प्रभावित समुदाय तथा परिवारलाई सहयोग गर्ने उद्देश्यले रकम संकलन गरिएको एजीएन जिल्ला समितिले जनाएको छ । समितिले अप्ठ्यारोमा परेका समुदायलाई सहयोग गर्न एकताबद्ध भएर जुट्ने सबै सहयोगी सदस्यप्रति धन्यवादसमेत व्यक्त गरेको छ ।

एजीएन जिल्ला समिति सिन्धुलीले आगामी दिनमा पनि आपसी एकता, सहयोग, सद्भाव र मानवीय सेवाको भावनालाई निरन्तरता दिने जनाएको छ ।