फिक्कलमा मेसिनबाट दुना टपरी बनाउने तालिम सुरु

नबिनबाबु अधिकारी

सिन्धुली १४ माघ ०८०

फिक्कल गाउँपालिका ६ आँपटारमा मेसिनद्वारा दुना टपरी बनाउने तालिम आइतबारबाट सुरु भएको छ । फिक्कल गाउँपालिकाको आयोजनामा ५ दिने दुना टपरी बनाउने तालिम सुरु भएको हो ।

गरिबी निवारणका लागि लघु उद्यम विकास कार्यक्रम अन्तर्गत सीप तथा व्यावसायिकता विकास सम्बन्धी दुना टपरी बनाउने तालिम सुरु भएको फिक्कल गाउँपालिका अध्यक्ष पार्वती सुनुवारले जानकारी दिनुभयो ।

महिलाहरूलाई व्यावसायिक दुना टपरी बनाउन तालिम मार्फत दक्ष बनाई सिपका माध्यमबाट महिलाहरूलाई स्वरोजगार बनाउन मेसिनद्वारा दुना टपरी बनाउने तालिम सुरु गरिएको उहाँको भनाई छ ।

तालिमको उद्घाटन गर्दै गाउँपालिका अध्यक्ष सुनुवारले पलाष्टिकमुक्त मात्र हैन दुना टपरीबाट महिलाहरूलाई आत्मनिर्भर बनाउन तथा रोजगारी सिर्जना गर्न र वातावरण प्रदूषण कम गर्न दुना टपरी बनाउने तालिमको आयोजना गरिएको बताउनु भयो । उहाँले भन्नुभयो “सालका दुना टपरी प्रयोगले हाम्रो स्वास्थ्य, वरपरको वातावरण स्वच्छ हुन्छ भने महिला दिदी बहिनीको उद्यमप्रति आकर्षण बढ्छ ।” तालिममा १२ जना महिलाहरूले तालिममा सहभागिता जनाएका छन् ।

जिल्लाका नौ वटा स्थानीय तहहरू मध्ये फिक्कल गाउँपालिका विद्यालय स्तरमा उद्यमशीलता विकास तालिम सुरु गर्ने पहिलो पालिका बनेको छ । गाउँपालिकाको उद्यम विकास सहजकर्ता मार्फत १३ वटा माध्यमिक विद्यालयमा कक्षा ८ देखी १२ सम्म अध्ययनरत विद्यार्थीहरूलाई उद्यमशिलता विकास (SIYB) तालिम दिन सुरु गरिएको हाे । जसमा व्यवसाय, आम्दानी, आय मूलका काम, स्वरोजगार, बजार र बजारीकरण, विक्रय कला आदी सम्बन्धी ज्ञान प्रदान गरिँदै आएको छ ।