कमलामाईमा गर्मीका कारण तीन दिनका लागि पठनपाठन बन्द

सिन्धुली २७ जेठ ०८२

कमलामाई नगरपालिकाभित्रका सबै सामुदायिक तथा संस्थागत विद्यालयहरूमा अत्याधिक गर्मीका कारण तीन दिनका लागि पठनपाठन बन्द गरिएको छ ।

नगर प्रमुख उपेन्द्र कुमार पोखरेलद्वारा हस्ताक्षरित सूचनामा उल्लेख गरिएअनुसार, गर्मीका कारण बालबालिकाहरूको स्वास्थ्यमा असर परिरहेको र जनस्वास्थ्यसमेत प्रभावित भएकाले २०८१ साल जेठ २८ गतेदेखि ३० गतेसम्म विद्यालय बन्द गर्ने निर्णय गरिएको हो ।

मेयर पोखरेलले भन्नुभयो “गर्मीका कारण बालबालिकाहरूको स्वास्थ्यमा गम्भीर असर पर्न सक्ने अवस्थालाई मध्यनजर गर्दै सबै विद्यालय बन्द गर्ने निर्णय गरेका छौँ । अभिभावकहरू र शिक्षकहरूले बालबालिकाको स्वास्थ्यमा विशेष ध्यान दिनु आवश्यक छ । हामी सबैले मिलेर गर्मीको समयमा सुरक्षित र स्वस्थ रहन प्रयास गर्नुपर्छ ।”

मौसममा सुधार आएपछि विद्यालयहरू पुनः नियमित सञ्चालनमा ल्याइने उहाँले बताउनुभयो । बालबालिकाको स्वास्थ्य प्रति जिम्मेवार हुन सबै सरोकारवालाहरूलाई उहाँले आग्रह गर्नुभयो ।